ودك تنامين ؛ نامي يابعد عيني ..!!
ودك تنامين نامي يابعد عيني
باين عليك التعب من أمس سهرانه
من ليلة البارحه وأنتي اتداريني
شوفي المرايه اعيونك حيل تعبانه
نامي لك شوي لو ساعة وخليني
يابنت عمر السهر مايغمض أجفانه
ولاني بطاير من ايدك هذي ايديني
ما دام فكري معاك اختل ميزانه
لو ترخي الشال لعيوني وتنخيني
أجيك فزعة اخو ذباح لإخوانه
صومي عن الناس سمي وأفطري فيني
يفداك قلب تربى بطيب جدانه
أنا ظلالك مادام الله معافيني
الله عطاك الغلا المعبود سبحانه
أنا أدري إنك نسفتيني وتلفتيني
مهما خسرتي معايه دوم ربحانه
نامي وباكر بكيفك طلعي عيني
القلب شرع لهمك كل بيبانه
وإذا غفيتي أمانه حيل غطيني
برموشك اللي من الأشواق رويانه
