الاخ قهوتسي وأبوطروق شيخ الشيوخ
السلام عليكم وشلونكم
هذا سلمكم الله وسلمن مررة من المرات الكثيرات كنت مصيف في سوريا أنا واخوي ومعنا (الدقرش) اللي هم عوايلنا الكرام .<<<نقطة ومن اول السطر
تخبرون صجت الوغدان وقرقة الحريم يدبلون التسبد.<<<نقطة ثانية
قال لي اخوي وش رايك يابوطروق الليلة نبيه ليلتنا ونبي نستانس لحالنا ويكفي اننا نتعب سنة كاملة ويوم تجي الإجازة نبلش بهالدقرش اللي...<<ثلاث نقط و ...إلخ
قاطعته وقلت:<<نقطتين فوق بعض وبرضه من اول السطر
تم (وابشر بسعدك وانا اخاك~
واركب على الباب ذا الحيني~) تبينا نسهر بأي كازينو
قال:<<.........إلخ
لأ لأ يا أخي لقد فهمتني غلطا"
أنا لم أقصد كازينوا" أنا أقصد مطعما" رائقا" من اللواتي على نهر البردى<<< مثل مانتم شايفين نزل على اخوي الدين (مع اني خابره مامن امور)
المهم وبحكم انه اكبر مني بتسعة شور وافقت وامري لله..
رحنا مع الشوفير<<(سواق التكسي للي مايعرفون لغة شمر) وقلنا له نبي أحسن وأفخم مطعم على الملوي نهر البردى.<<عاد مصخت
قال ابووسيم<<السائق ابشروا باوديكن لمطعم كتير زريف
الوكاد وصلنا المطعم وهم يستقبلونا كل اللي يشتغلون بالمطعم تقل أول مرة يجيهم زبون ويقولون هلا بالشيوخ هلا بالامراء تفضلوا من هون
وهم يحطوننا على اكاالطاولة اللي تفتح النفس وهو يجينا واحدن له قذيلة متعوب عليه قال: طلباتكن يا أمرا
قلنا نبي كذا وكذا وهلون وهلون وقبل كل شي هاتولنا مقبلات مشكلة (يعني انا متطورين) عمار يالسعودية ناكل الكبسة على الريق
وهو يجينا اكا الهامة لابس طربوش احمر وشروال من اللي يتدودلن وماسكن له دله وفناجيل وعليه شوارب لو ياقف جنبك دخلن باذنك من طولهن!
قال: هلا بشيوخ نجد<< يالربع يازين هالكلمة تخليك تعيش جو مشيخة
وهو يصبلنا من القهوة قال: منين الشيوخ قلنا من شمر وهو يصيح ياميت اهلين وسهلين باهلي وناسي أنا كمان من بيت شمر<<< التسذوب لو قايلينله ص كان قال وانا من بيت ص
قلت له انت من اي شمر قال: انا من الجربا!!!
وانا انزل فنجالي واقوم من الكرسي وآخذ الدلة منه وقلت: والله ان تقعد قال شو مابيصير قلت: لعنبوحيك انت من شيوخ شمر اقعد وانا اقهويك
قال ولو مابيصير هالحكي بعدين صاحب المطعم يئتلني
المهم قعدنا نتفنجل انا واخوي وهو واقف بالدلة ويوم جت المقبلات وانا امدله فنجالي وقلت بس
وهو ياخذ الفنجال ويضرب به على الارض إلا غادين الفين قطعة
انا انخرعت وقلت خير انشالله وش فيه
قال ولو هذا فنجالك والله ماحد يشرب فيه بعدك
وهي تجيني الكبره والغرور وداء العظمة وانا امعد من مخباي ألف ليرة وعطيتهن إياه وهو ياخذ فنجال اخوي ويفدعبه (يبي الف ثاني بس اخوي عطاه اشكل)
تعشينا وغادرنا المطعم بمثل مااستقبلنا به من حفاوة وتكريم وركبنا مع ابووسيم ورجعنا
يوم وصلنا اهلنا قالوا جتنا حرمة شمرية تبيع ملابس وشرينا كل بضاعته قلت وش دراكم انه شمرية قالوا سألتنا وقلناله حنا شمامرة قالت: وانا كمان من بيت شمر!!!!!!!!!
قلت ياخبول هذي تضحك عليكم
قال اخوي عين خير هم اقل شي اشتروا هدوم اما انت دفعت ألف على فنجال قهوة.!!!
________________________________
تمت والسلام ختام
رد مع اقتباس
حمود الناصر
المفضلات